Ka'naun Gosat fi di Opo Yesus hai Makus

1 Endohin ha naa, ka'naun gosat. Ha naa, Oplastala na' Anat nak endohin.aGeba di ngaan,Yesus Karistus, ha dii Oplastala eptoke leuk filim bal-balak. Nak endohin mulai gam naa:

Yohanes fuka tohon la Opo Yesus nak e'nei

2 Leuk fi di Yesus peltanek nak e'nei, do, Oplastala siuk geba sa ngaan Yohanes la fuka tohon ute Yesus. Tu betu leuk, Oplastala pakek geba sa ngaan Yesaya fifin, tu da sula leuk fen:

“Touk! Yako siuk geba saa la da leo pidak tohon ute Kae.

3 Ramak geba dii ba mngaha fi di neten fuun fen,

‘Gebaro hansiak iak pun-matak tohon, wahan nan Tobon la kaduk gam mahik!

Pun-dofo tohon la ma sale Ringe.’”

4-6 Gebaro rangi Yohanes la ‘geba ka bil-tatak gebaro’. Da defo di neten fuun. Du puna nak elwani fi di haiwane sa ngaan ‘unta’ folon. Du puna na' ka helu awan fi di haiwane okon. Nak i'naat, do, fatit tong tu lewen waen fi di mua. [Tu iyero gam dii, do, Yohanes ba newe gam di geba sa ngaan Elia betu leuk dii.]

Tu dii, geba waro fi di kota Yerusalem tu fi di petak Yudea hansiak, kaduk gam di neten fuun dii la du e'dobon tu Yohanes. Sira kaduk la du linga Yohanes tong tu caan nak eptoketo. Ring prepa la sira fen, “Iak kimi fuka lalen nim tong tu deak fi di nim salaro hansiak beka, la ngei Oplastala gliduk tatak nim salaro dii. Fuka lalen nim sepo gam dii, tem iak kimi eruk la ya biltatak kimi beka, la puna etan fen kimi gosa saro sakik tu Oplastala.”

Eta du caan na' fisarat, sira fuka laleno. Petu ringe bil-tatak sira fi pao wae Yordan.

7 Tu da pe'newa tongi fen, “Ramak Geba saa ba hai hede fi di yako. Ringe na' kuasa haa sa liak yako, tu yako emtai la a puna nak ata moo.e 8 Eta yako, do, a bil-tatak kimi tu wae baa, bu ramak Ringe puna lesin fi di yako, tu Da eptau lalen nim tu Opo na' Suhat Enmilit.”

Yohanes bil-tatak Opo Yesus

9 Sepo fi dii, Yesus kaduk fi di fenlale Nasaret fi di petak Galilea gam di Yohanes. Petu Yohanes bil-tatak Ringe fi pao wae Yordan. 10 Bil-tatak sepo, petu Yesus riha. Tuged-tugedak langit ekfukak, tu Da kita Opo na' Suhat toho gam di ermuken saka Yesus fafan. 11 Tu e'caan tongi Oplastala na' lien teden fi sa' langit fen,

“Kae, do, Ya nang Anat enmusit.

Tu Kae plal-gosak Yako laleng.”

Setan nin olo haat ba reha Opo Yesus fi di mehet kakun

12 Sepo fi dii, Opo na' Suhat uge Yesus gam di neten fuun. 13 Di neten fuun dii, do, geba sa bolboli moo, moik haiwane emlahato baa. Tu Da mele beton pol-paa lear pol-paa, tu setan nin olo haat ba reha e'dage Ringe, bu jadi palek moo. Tu Opo nak emsikelo fi sa' langit kaduk la du ba leleang Ringe.

Opo Yesus gam di Galilea la ka'nauk Oplastala na' tohon

14 Tu di du frake Yohanes pa frogok ringe gam di bui dii, petu Yesus oli gam di petak Galilea. Tu da bletak Ka'naun Gosat fi di Oplastala, 15 fen, “Caan gos-gosa! Tu naa, Oplastala nak e'dengan datik haik. Tu naa, gebaro hansiak bisa du tewa fen Opo ba gao prenta.

Petu iak kimi deak fi di nimi ephakato, la kim oli gam di Opo, tu kimi e'lalek Ka'naun Gosat fi di Ringe.”

Opo Yesus kalak geba ka hama ikan la du hai polok Ringe

16 Petu lalen saa, Yesus ba iko di rana Galilea fifin. Ringe kita geba ka hama ikan. Geba sa ngaan Simon, tu na' wai Andreas. Sira ba biduk, tu sir nin e'nei gam dii. 17 Petu Yesus kalak sira fen, “Gam mahik la kim hai polok Yako. Kimi biasa epsuluk ikan, bu Yako la eptoke kimi la epsuluk sakik geba.”

18 Caan sepo gam dii, petu du esbobik bidut, pa du hai polok Ringe.

19 Sepo fi dii, Yesus iko tehuk, petu Da kita Sebedeus na' anat rua sakik, do, Yakobus tu na' wai Yohanes. Sira maa di waga lalen saa, du ba e'deduk nin jaring. 20 Kita geba rua dii, petu Da kalak sira fen, “Gam mahik la kim hai polok Yako.”

Du caan gam dii, petu du efkerek tatak nin ama tu nin geba ka puna e'neiro maa di waga dii, pa du hai polok Yesus.

Opo Yesus yahak setan fi di geba saa di fenlale Kapernaum

21 Sepo fi dii, Yesus tu gebar paa di kaduk fi di fenlale sa ngaan Kapernaum. Sira ba' dii eta lea endeat, do, geba Yehudiro nin lea ka seba Oplastala.h Petu Yesus rogo tongi gam di huma snebat lalen, tu Da peltanek eptoke gebaro. 22 Geba har dii du ba caan eptoken dii, du ba sepak malano fen, “Geba ha naa, picaya! Tu Da eptoke iyero naa, do, beta. Tu Da tewa iyero! Wahan fi di nam geba eptoketo naa, saa te eptoke emngesa gam di Ringe na moo.”

23 Yesus ba fisara hede, petu setan kehak geba saa, baa di huma snebat lalen dii. Petu geba di emngaha tu lien haa, 24 fen, “Hei Yesus, geba Nasaret! Kae la Kae emkuak kami fi naa!? Kae kaduk la Ku eprari kami? Yako tewa Kae. Kae naa, do, Geba Enmilit fi di Oplastala, ha dii sas-ka puna sala.”

25 Petu Yesus esgeik setan dii fen, “Emtoro beka! Suba beka fi di geba dii!”

26 Tu dihe setan di weak geba di boho-boho, tu da emngaha, petu da suba tatak geba dii. 27 Linga gam dii, petu gebaro hansiak ba' dii dikero resek-resek, eta sira prepa ute saro fen, “Gam doo, naa? Ma mamba kita ii sa gam naa. Geba naa eptoke tu kuasa. Eta Da lofa setan, bu du caan Ringe tongi. Picaya!”

28 Sepo fi dii, Yesus na' pempunat gosat dii, fi di fifi tan fifi eta gebaro hansiak di petak Galilea caan iyor dii.

Opo Yesus pegosa Petrus na' ina kete, tu geba waro tongi

29 Sepo fi dii, Yesus tu na' gebar paa dii, do, Simon tu Andreas, tu Yakobus tu Yohanes, du suba fi di huma snebat dii, pa du iko gam di Simon sira nin huma. 30 Simon na' ina kete empei, petu da bage, wahan da motin. Tu di Yesus tu na' geba enhaito rogo gam di huma lalen, gebaro prepa fen, “Ina kete ba motin.”

31 Caan gam dii, petu Yesus rogo la linga fina emtuat dii, petu Da gao fahan, tu Da fedak. Tu dihe, nak empeit di difuk, petu da gosa. Petu ringe suba pa sareate sira.

32 Eta emhawen, do, gebaro eptanak nin geba empeito, tu nin geba har dii setan ba kehakoro dii ute Yesus la Da pegosaro. 33Tu gebaro hansiak har dii du ba eptea fi di fenlale dii epsulun fi di huma di na' sa'mena. 34 Petu Yesus pegosa gebaro dii hansiak fi di nin empeit sa pi gosa. Tu Da yahak setano e'demen. Tu Ring eruk moo la setano di fuka la gebaro tewa fen Ringe dii, do, sane, wahan sira tewa betah.

Opo Yesus iko boli petak Galilea, tu Da prepak Ka'naun Gosat fi di Oplastala

35 Supan eprede-predek, Yesus hosak, petu Da iko tatak huma dii. Da iko gam di neten pemtoron fi di fenlale kakun, petu Da salawatu fi dae la stori tu Oplastala. 36 Eta Simon tu na' rokoro hosak, sira dufa Yesus moo, petu sira iko hama Ringe. 37 Mameta sira dobo Ringe, petu sira prepa, “Aman, geba waro ba hama Kae.”

38 Bu Yesus fen, “Ii dii gosa. Bu ma oli moo, tu ma iko hede la ma peltehuk nan tohon. Tu kita gam di fenlale gerano bol-boli. Iak Yako eptoke sira fi dae tongi. Tu Ya nang tohon olon hede.”

39 Patehen ii ha dii, Yesus iko fi di petak Galilea hansiak, tu Da eptoke gebaro fi di huma snebato, tu Da lofa setan e'bohono.

Opo Yesus pegosa geba emgihin saa

40 Ba' dii, do, geba emgihin tu nak empeit oko-kawa saa. Tu geba di kaduk ute Yesus, tu da singtoo di Yesus pupan lalen. Tu da prepa fen, “Aman é, sibi yako beka! Ya tewa fen Aman na' kuasa la pegosa yako. Tu a laha la Ku pegosa yako, la gebaro bara emgihik yako tehuk moo. Fi di Kae rahek.”